ლიონელ მესი: “მოედანზე ვცდილობ მაქსიმალური სიამოვნება მივიღო”

ლიონელ მესიმ, რომელმაც ტრავმით გამოწვეული ხუთკვირიანი იძულებითი პაუზის შემდეგ ვარჯიში განაახლა, უეფა-ს ოფიციალურ ვებ-გვერდს ინტერვიუ მისცა.
-    თქვენთის მნიშვნელობა აქვს, გოლს როგორ იტანთ?
-    თუ გოლს წინ საუცხოო კომბინაცია უძღვის, მაშინ ემოციებს უფრო მეტად გამოვხატავ. ამავე დროს, თუ დერბიში ბოლო წუთზე დამატებაზე შედეგიანად ვითამაშებ, გატანილ ბურთს ისე აღვნიშნავ, თითქოს ის, ჩემს კარიერაში საუკეთესო იყოს.
-    ყველა ბურთი გახსოვთ, რომელიც გაგიტანიათ? ამასთანავე, თუ ფიქრობთ იმ საგოლე მომენტებზე, რომლებიც ვერ გამოგიყენებიათ?
-    ვერ გეტყვით, შევძლებ, თუ არა ჩემს მიერ გატანილი ყველა გოლის დაწვრილებით აღწერას, მაგრამ მათი უმეტესობა კარგად მახსოვს. პირადად, ესპანეთის თასზე “ხეტაფესთან” გატანილ ბურთს გამოვარჩევ. ის ძალიან ჰგავს გოლს, რომელიც 1986 წლის მსოფლიოს ჩემპიონატზე, მარადონამ, ინგლისის ნაკრებთან მატჩში, საკუთარ ანგარიშზე ჩაიწერა. გარდა ამსია, ის გოლიც მომწონს, რომელიც სამხრეთ ამერიკის ჩემპიონატზე მექსიკელთა კარში “შევაგდე”. რაც შეეხება გაცუდებულ მომენტებს, ვცდილობ, მათზე არ ვიფიქრო.
-    სხვების დარიგებებს თუ უგდებთ ყურს?
-    რონალდინიო, დეკუ და არგენტინის ნაკრებში ჩემი პარტნიორი ვერონი, ყოველთვის მეუბნებიან, რომ დრიბლინგი მეტოქის საჯარიმო მოედნის სიახლოვეს უნდა გამოვიყენო, ხოლო როდესაც მოწინააღმდეგის კარიდან შორს ვარ, მაშინ, სჯობს პასი მივცე. ვცდილობ, ასე მოვიქცე, მაგრამ საქმე ისაა, რომ ბურთთან ერთად ყოფნა ძალიან მომწონს.
-    საკუთარ თამაშში, რის გაუმჯობესება გსურთ?
-    ორი აზრი არ არსებობს, რომ საჰაერო ორთაბრძოლებში თამაში დასახვეწი მაქვს. თუმცა, იმის კომპენსირებას, რომ ტანდაბალი ვარ, სისწრაფის ხარჯზე ვცდილობ.
-    გუნდზე, გულშემატკივრები რა გავლენას ახდენენ?
-    ტრიბუნაზე არსებული ხმაურიანი ატმოსფეროს გარეშე, შთაგონებას ვერ მიიღებ. ასეთ დროს არ აქვს მნიშვნელობა, გულშემატკივრები მხარს შენ გიჭერენ, თუ არა. როდესაც “ნოუ კამპზე” ვთამაშობ, ან არგენტინის ნაკრების შემადგენლობაში “რივერ პლეიტის” საშინაო არენაზე ვასპარეზობ, საოცარი გრძნობა მეუფლება. მართალია, “ფანებს” გოლის გატანა არ შეუძლიათ, მაგრამ მათი მხარდაჭერა განუზომელია. სხვა მხრივ, სტუმრად ჩატარებულ მატჩებში, ფეხბურთელზე გულშემატკივრების ზეგავლენა, უკვე მის ხასიათზეა დამოკიდებული. პირადად, ტრიბუნებზე მსხდომი ქომაგი ხელს არასოდეს მიშლის.
-    საფეხბურთო მოედანზე, უკანასკნელად როდის გაიღიმეთ?
-    ვერ გეტყვით ვიღიმები, თუ არა, მაგრამ მოედანზე ვცდილობ მაქსიმალური სიამოვნება მივიღო. როდესაც ვაგებ, თავს ძალიან ცუდად ვგრძნობ და არავისთან საუბარი არ მსურს. წაგება არ მიყვარს _ პლაყსტატიონ –ის თამაშის დროსაც კი.
-    თუ მატჩის დროს არაფერი არ გამოგდით, ამაზე როგორ რეაგირებთ?
-    დრიბლინგი თუ არ გამომდის, მაშინ, ვცდილობ უფრო პასებით ვითამაშო. იმ შემთხვევაში, თუ თამაში საერთოდ არ მიმდის, მაშინ ინიციატივას პარტნიორებს ვუთმობ. თუ ჩემამდე ბურთი არ მოდის, ვცდილობ მეტი ვიმოძრაო და თანაგუნდელებს საკუთარი თავი შევთავაზო.
-    ყოფილა ისეთ შემთხვევა, რომ თქვენს წინააღმდეგ უხეში თამაშის შემდეგ, მდგომარეობიდან გამოსულიყავით?
-    ვერ ვიტან, როდესაც ფეხებში მაშინ მირტყამენ, როცა უბურთოდ ვარ. რამდენიმე ასეთი შემთხვევის შემდეგ, კინაღამ წონასწორობა დავკარგე, მაგრამ თავის შეკავება მაინც მოვახერხე. ვცდილობ, ჩემს მეტოქეს პასუხი ყოველთვის ფეხბურთით გავცე.
-    კარში დარტყმას ძლიერად ცდილობთ ხოლმე, თუ უფრო ტექნიკის ხარჯზე მოგწონთ გოლის გატანა?
-    თუ ერთდროულად ორივე გამოგდის, მაშინ გოლი, ფაქტობრივად, გარდაუვალია. ასეთი ბურთი ვენესუელას ნაკრებს გავუტანე, როდესაც ბურთი მეკარისგან მარჯვენა კუთხეში მოვათავსე. ჩვეულებისამებრ, ვცდილობ ზუსტად დავარტყა. ისეთი ძალის დარტყმას ნამდვილად არ ვფლობ, როგორსაც რობერტო კარლოსი.
-    არ გეჩვენებათ, რომ ზოგიერთ შემთხვევაში “ბარსელონა” ძალიან “ამლაშებს”, როდესაც ცდილობს ლამაზი გოლი გაიტანოს?
-    ლამაზი ფეხბურთის თამაში ძალიან მიმზიდველია. მითუმეტეს მაშინ, როდესაც შენი პარტნიორები რონალდინიო, ეტოო, ხავი, დეკუ და ტიერი ანრი არიან. თუმცა, ჩემი აზრით, გვმართებს უფრო ეფექტურად ვიმოქმედოთ.
-    თქვენ, რონალდინიო და ანრი, მოედანზე ბევრს გადაადგილდებით. ასეთ შემთხვევაში, როგორ ახერხებს გუნდი სათამაშო სქემის შენარჩუნებას?
-    ვცდილობთ, ორგანიზებულად ვიმოქმედოთ – თუ ერთი მარცხნივ გადაადგილდება, მაშინ მეორე მარჯვნივ “იხსნება”. ზოგჯერ პირიქით, ყველა ერთ ფლანგზე ვინაცვლებთ, რათა მოწინააღმდეგეს სიძნელეები შევუქმნათ.
-    შეტევაში, პარტნიორებთან საერთო ენას, ადვილად პოულობთ?
-    საკმაოდ რთულად, რადგან საჭიროა პარტნიორი საფუძვლიანად შეისწავლო. ეს ყველაზე მნიშვნელოვანია, რადგან იმაში გეხმარება, თუ როდის უნდა მისცე პასი, როდის გაიქცე, რათა თანაგუნდელისგან გადაცემა მიიღო.
-    “ბარსელონაში” თქვენი პარტნიორების გარდა, კიდევ რომელი ფორვარდის თამაშის ყურება გსიამოვნებთ?
-    მათი რიცხვი საკმაოდ დიდია: კარლოს ტევესი, ხავიერ სავიოლა, აგუერო, უეინ რუნი, კრიშტიანუ რონალდუ. თუმცა, ეს სრული სია არ არის.